- Slå mjølka opp i gryta og varm forsiktig opp. Mjølka skal varmast opp til ho er handvarm, dvs. 37 grader. Tilsett løype, rør rundt og la stå til mjølka har løypt seg. Blir mjølka for heit blir løypen øydelagt.
- La gryta stå ein halvtimes tid til osten ha samla seg og fastna noko – mest som gele. Ikkje rør!
- Varm så forsiktig opp på nytt. Når det nærmar seg kokepunktet må ein røre litt, helst berre løfte/vende på kvitosten for at han ikkje skal legge seg i botn og svi seg. Etter at gryta er koma på kok er det ikkje fare for brenning, så sant det ikkje blir stormfyra. Gubbosten skal vera «rosåt» – ha fine sjatteringar frå kvitt til lys brunt. Difor er det om å gjera å ikkje røre sund osteklumpane. Di mindre røring di større klumpar.
- Gubb av 20 liter mjølk kokar inn på 4 – 6 timar, litt etter kva kokekar ein har og kor hardt ein fyrar. Mot slutten må ein røre / vende osten heile tida. Teikn på at han er ferdig: Dreg ein sleiva gjennom massen, så skal søet ikkje lenger flyte i faret etter sleiva. Men, la han heller ikkje stå lenger! Da blir han for hard.
- Aus opp osten i eit trau eller anna vidt kar. Rør / vend til han er så godt som kald. Elles vil mjølkesukkeret krystallisere seg og han blir «sandin», dvs. kornete. Det er lite stas med sandin gubb!
- Legg osten i former kledd med pergamentpapir (tykt matpapir). Stapp godt ned i form.
Neste dag har osten fastna og kan skjerast med kniv.
Skjer tjukt av gubben!
