- Lag deigen kvelden før du skal steikja krotakaker. Rør ut gjær i kaldt vatn og tilset dei øvrige ingrediensane. Deigen skal då vera som ein fast brøddeig. Set til heving over natta.
- Når ein skal knoa opp att neste morgon er deigen blitt ganske laus. Då lagar ein seg ei blanding av sikta rug med cirka 15 % kveitemjøl. Av dette brukar ein etter behov, litt og litt, til deigen er lett å arbeida med og let seg lett baka ut. Her er det berre prøving og trening som skal til. Denne knoa bør og liggja å heva seg litt før ein lagar emna som kan vera på cirka 120 gram, etter kor stor steiketakke ein har. Om du er nybyrjar er det lurt å laga mindre emne i starten.
- Til breiemjøl (utbaking) brukar ein same sort mjøl eller berre kveite. Bak ut kakene til cirka 40 cm i diameter. Etter utbaking vert dei krota. Ein rullar eit spesielt krotakjevle over på langs og på tvers slik at det vert ruter. Dette for at dei ikkje skal blåsa seg opp under steikinga. Kakene vert steikte i ein oppmura, open ovn berre til dette bruket. Dei vert lagde på ein spesiell spade som vert førd inn i ovnen og plasserer kaka på ei jernplate. Det vert fyra med orreved på begge sider av plata inni ovnen. Vedskiene av orreved skal vera ca 65 cm lange og open eld skal slå over kakene under kvelvingen i baksteomnen. Kakene skal ikkje snuast og dei skal vera harde og sprø når dei er ferdig steikte.
Denne oppskrifta gir cirka 90 krotakaker.
Krotakaketradisjonen har halde seg fram til i dag, men no lagar ein ikkje i så store mengder.
Det er mykje vanleg å bløyta kakene og eta dei med smør og sukker, prim, egg eller anna pålegg, men dei er og gode som knekkebrød med smør og til dømes ost.
Tips!
Om du vil steikja same dag som du lagar deigen kan du røre ut gjær i lunka vatn.
Ein kan steikja krotakaker på elektrisk takke, men då går ein glipp av den fine røykesmaken av brent orreved. Ved steiking på elektrisk takke må kakene snuast, sidan ein ikkje har overvarme her.
